Superstrada Tiranë-Durrës do të kthehet në një autostradë e kategorisë A
Modernizimi i infrastrukturës ekzistuese po vijon në një tjetër aks të rëndësishëm, superstradën Tiranë- Durrës, e cila do të kthehet në një autostradë të kategorisë A, duke shtuar korsitë e lëvizjes për një lehtësim të ndjeshëm të trafikut.
Kryeministri Rama, i shoqëruar nga Zv/kryeministrja dhe Ministrja e Infrastrukturës dhe Energjisë Belinda Balluku vijoi inspektimet e sotme në kantierin e këtij aksi.
“Këtu jemi në fazën e parë të rikonstruksionit, të rehabilitimit dhe zgjerimit të autostradës Tiranë- Durrës, rreth 33 km. Faza e parë, ashtu edhe si dy fazat e tjera përfshin rreth 10 km në total. Ndërkohë që, kurora zgjerohet dhe shkon në 32.5 metra, duke krijuar për secilën karrexhate nga 3 korsi kalimi dhe duke lënë gjithashtu edhe korsinë e emergjencës. Kalojmë nga një superstradë në kategorinë e autostradave A, duke u bashkuar kështu me gjithë të tjerat që ne ndërtojmë. Shpejtësia maksimale është 130 km dhe ndërkohë të gjitha parametrat e sigurisë janë përmbushur. Ashtu si edhe në kantierin e mëparshëm, edhe në ketë kantier, kryeministër kemi bërë të gjithë spostimin e linjave të OSSH-së dhe linjave të ujësjellës-kanalizimeve. Këtu janë spostuar të gjitha pemët dhe janë mbjellë diku tjetër, pra pa pasur asnjë humbje dhe janë bërë të gjitha kanalizimet e reja. Fazat janë duke avancuar shumë mirë. Këtu jemi në 6 km e para që shkon nga Casa Italia deri në mbikalimin e Kasharit dhe më pas kemi dhe 3 km e tjera që shkojnë deri në Vorë. Nga Vora pastaj kemi fazën e dytë që shkon deri në Sukth dhe nga Sukthi pastaj që shkon deri në Shkozet. Janë të gjitha të parashikuara sipas buxhetimit në vite, ndërkohë dhe në këtë kantier kemi një avancim shumë të mirë të punimeve. Kemi shkuar në 30%, pavarësisht se kontrata përfundon deri në shtator 2026. Nuk kemi pengesa të trafikut sepse nuk janë prekur korsitë në të dyja krahët dhe besojmë që do të dorëzohet para afatit. Shumë është të themi para dhjetorit, se i bie gati 10 muaj para afatit, megjithatë ky është synimi ynë.” – detajoi Zv/Kryeministrja Balluku.
Ndërsa, Kryeministri Rama sugjeroi që hyrja për në kryeqytet të jetë e veçantë për sa i përket arkitekturës, duke përfshirë më shumë elementë artistikë.
“Duhet të vihen pemë të larta e mbase duhet të gjejmë një mënyrë të krijojmë një mur dekorativ, një lloj ndarëse dekorative. Mund të gjejmë një gjë që të bëhet shumë bukur midis të dyjave. Duhet menduar, duhet një gjë artistike se është hyrja e kryeqytetit. Ndoshta mobilizojmë të gjithë arkitektët, të bëjnë një copë secili dhe të bëhet si korridor artistik.” – u shpreh ai, teksa kërkoi edhe hartimin e një masterplani për të shmangur problemet e krijuara nga trafiku i brendshëm.
“Duhet të bëjmë masterplanin tek zona këtej sepse kjo zona këtej ka shumë problem nga trafiku i brendshëm për gjithë këto kompanitë. Harxhojnë shumë kohë këtu brenda. Në fakt ata janë të gatshëm të punojnë me ne për masterplanin dhe t’i mbështesim dhe të bëjmë ndonjë gjë që të ketë një rrjedhshmëri më të mirë trafiku, se hyn tek ato, ku janë mijëra e mijëra punonjës tek ato kompanitë.” – u shpreh Kryeministri.
Sa i përket kësaj problematike, Zv/Kryeministrja Balluku shpjegoi: “Ne kemi filluar planifikimin po në formën e një masterplani, pastaj do fillojmë një projekt të detajuar të dy hyrjeve të reja të Tiranës, të cilat do të zgjidhin pikërisht këtë problem që thoni ju, duke e lënë hyrjen e Kamzës vetëm për pjesën e zonës. Pra, jemi duke studiuar një hyrje, e cila sjell autostradat e veriut dhe i lidh në lotin numër një, pra pas Shqiponjës, aty ku kemi nyjen e madhe. Dhe nga ana tjetër, jemi duke dizajnuar edhe hyrjen, ashtu siç folëm dhe herën e fundit nga rruga e Arbrit. Rruga e Arbrit tashmë futet dhe krijon një hinkë pra nga shkalla e Tujanit krijon një hinkë në Tufinë, e cila sigurisht, pengon gjithë trafikun, përveç amortizimit që ajo rrugë ka dhe do jetë e vështirë që të parashikohet nga Bashkia e Tiranës. Kështu që, e gjithë hyrja do të shkojë dhe do të lidhet me lotin e pestë. Pra, në rreth rrotullimin e madh të Tufinës, që e çon ose sipër, pra në zonën e Farkës dhe të TEG-ut, ose e zbret pastaj poshtë për të vazhduar për të ardhur në këtë autostradë.” – u shpreh ajo.
Sa i përket punës për Qendrën Kombëtare të Monitorimit të Trafikut, Zv/Kryeministrja Balluku informoi se është filluar me provën gjenerale.
“Ne e kemi filluar provën gjenerale. Kamerat kanë filluar të lidhen një nga një në sistem. Kemi bërë një test para pak ditësh.” – u shpreh ajo, teksa theksoi se “ 200 kilometrat e para janë shumë të rëndësishme, sepse do të na ndihmojnë që të kuptojmë dhe se si do funksionojë. Skuadra është shumë komplekse atje, ashtu siç ju e dini. Pra, janë disa njësi operative, përveç autoritetit rrugor shqiptar, policisë rrugore, kemi emergjencat që janë të lidhura aty. Kemi urgjencën kombëtare, kemi shumë njësi të cilat duhet të bashkëpunojmë dhe jemi në fazën e rekrutimit, po marrim djem dhe vajza të reja që kanë edhe një farë dëshire tek inovacioni dhe tek IT përgjithësisht, pra kanë disa aftësi të tilla dhe mendojmë që do jetë një nga projektet më inovative që do të sigurojë gjithë pjesën e sigurisë rrugore, por edhe të sigurisë kombëtare, mendojmë ne.” – tha ajo.