Fjala e ministres Balluku pas uljes së avionit të parë në aeroportin e Kukësit

Fjala e Ministres së Infrastrukturës dhe Energjisë Belinda Balluku pas uljes së avionit të parë në aeroportin e Kukësit ‘Zayed – Flatrat e Veriut’:

Zonja dhe zotërinj,

Motra dhe vëllezër,

Kjo është një ditë e veçantë, një ditë që e kemi pritur shumë. Kemi nisur punë para dy vitesh për ndërtimin e aeroporti të dytë ndërkombëtar në Republikën e  Shqipërisë, atë të Kukësit. Ka qenë një punë intensive, pasi unë vijë nga bota e aviacionit dhe nuk ka asnjë shans që të ndërtohet një aeroport më shpejt se kaq dhe kjo është bërë me një punë të jashtëzakonshme nga të gjithë burrat dhe gratë këtu në Kukës, por padyshim edhe nga një grup që unë dua të falenderoj sot. Të gjithë ata që kanë kontribuar në këtë punë kaq të rëndësishme, në këtë vepër kaq të rëndësishme për gjithë shqiptarët, një grup njerëzish të cilët kanë punuar ditë dhe natë.

Në vitin 2018 kryeministri Rama nxori një Twitter ku thoshte që Kukësi do të ketë një aeroport ndërkombëtar. Menjëherë i kam nisur një mesazh duke i thënë që aeroporti Kukësit ishte një aeroport ushtarak dhe shumë i vështirë për tu naviguar. Më ka thënë që ju do e bëni sepse unë e di që do e bëni, kështu që nisni menjëherë nga puna. Për të thënë të drejtën edhe unë kam pasur dyshimet e mia nëse do të bëhej kaq shpejt, por ia kemi dalë. Dua që të theksoj disa teknikalitete që nuk janë të rëndësishme ndoshta për njerëzit këtu sepse ju nuk keni asnjë dyshim që aeroporti është atje dhe nuk është 3D. Ju nuk keni asnjë dyshim që avioni i parë Air Albania jonë u ulë në pistë dhe ju nuk keni asnjë dyshim që Edi Rama di ti bëjë punët, mban fjalën dhe i bën në kohë rekord, por për të gjithë ata që do të dalin pas pak për të bërë analistët e aviacionit, për të gjithë ata që do të na tregojnë nëse avioni u ulë përpara në Tiranë apo është nisur nga Tirana dua t’ju sqaroj dhe kështu ta keni për të gjithë kronikat sot në darkë. Sigurisht në aviacion ka rregulla, rregullore europiane dhe mbarëkombëtare, të cilat ne i respektojmë sepse Shqipëria është një vend europian, është një vend që hedh hapa çdo ditë e më shumë për tu bërë anëtar i Bashkimit Europian dhe si e tillë ne i respektojmë këto rregulla të cilat janë në fuqi. Duke nisur nga sot ky aeroport është operacional. Ju sapo e parë, jeni dëshmitarët e këtij fakti. Duke nisur nga sot në këtë aeroport do të nisin të gjitha testet nga kompanitë ajrore që janë në kontakt me operatorin pra të aeroportit, me koncesionarin. Do nisin nga puna për të lidhur kontratën për të provuar pistën, për të validuar procedurat e quajmë ne në botën e aviacionit dhe sigurisht ajo çfarë është më e rëndësishmja për ta bërë këtë aeroport sa më tërheqës për të gjithë zonën, jo vetëm për Kukësin, por për të gjithë trevat shqiptare këtu rreth e përqark. Ju e dini shumë mirë që këtu do të ketë pasagjerë nga Kosova nga Maqedonia e Veriut, nga Mali i Zi dhe nga kudo. Kukësi do të kthehet në një pikë të re të zhvillimit ekonomik në Republikën e Shqipërisë dhe kjo do të bëhet sipas rregullave dhe sipas ligjeve në fuqi. Kështu që në datë 17 qershor kur mbaron afati i publikimit që ne e kemi nisur, në atë datë aeroporti i Kukësit do të jetë aeroport totalisht i përdorshëm nga të gjitha kompanitë. Kështu që për të gjithë ata që do të kenë pyetje sot në darkë nëpër panele dhe nëpër edicionet e lajmeve po jua jap ta dini përgjigjen. Ky është një aeroport operacional, sapo e kemi faktuar dhe ndërkohë nga ky moment i lihet në dorë koncesionarit për të vazhduar të gjithë marrëveshjet me kompanitë ajrore që nuk janë të pakta.

Që këtu do të fluturohet për në shumë qytete të Gjermanisë, me një nga kompanitë ajrore më prestigjioze të tregut gjerman të aviacionit, që këtu do të fluturohet për në Angli, që këtu do të fluturohet për në Zvicër në mjaft qytete që nuk fluturohet nga Tirana praktikisht. Aeroporti i Kukësit do të jetë gjeneza e një historie të re për aviacionin civil. Qeveria Rama ka një plan të mirëfilltë kombëtar për aviacionin civil. E kemi shpallur këtë plan dy vite më parë në Vlorë, aty ku vetëm pas pak ditësh do të hapet kantieri. Kantieri për të ndërtuar një aeroport tjetër, aeroportin më të madh në Shqipëri, i cili siç u përfundua ky këtu në Kukës do të përfundojë edhe në Vlorë për ti dhënë Shqipërisë mundësinë për të shkuar në çdo cep të botës dhe për ti dhënë botës mundësinë për të vizituar çdo cep të Shqipërisë.

I kemi dëgjuar shpesh të thonë që shqiptarët nuk kanë nevojë për aeroporte, kanë nevojë për bukë. Shqiptarët nuk kanë nevojë për bukë që të vijë me makina dhe me qese, ashtu siç i shikojmë rëndom duke shpërndarë ndihma për të mbledh vota. Nuk kanë nevojë shqiptarët për qese buke. Shqiptarët kanë nevojë për punësim dhe aeroportet gjenerojnë punësim. Shqiptarët kanë nevojë të lëvizin të lirë dhe aeroportet e japin këtë mundësi, aeroportet siç thotë kryeministri janë fabrika buke. Një aeroport lëviz ekonominë. Do t’ju jap një rast shumë të thjeshtë, pasagjerët që erdhën sot nga Londra apo ata që do të vijnë nga Zvicra, nga Gjermania, nga Italia, nga Greqia dhe kudo tjetër, ata vijnë në vend dhe gjenerojnë të ardhura. Dikush sepse do të blejë diçka më shumë, dikush sepse do të shkojë të qëndrojë në një hotel, dikush sepse do të përdorë një restorant. Ai restorant fruta perimet ndoshta i merr nga Divjaka, atje ku do të fillojë të paguajë për të marrë më shumë, sepse ka më shumë klientë. Divjaka mund të blejë pajisje nga Elbasani dhe kështu me radhë një ekonomi zinxhir e tregut e cila nxitet thjesht dhe vetëm nga një pasagjer që zbriti këtu në Kukës. Aeroportet janë frymë zhvillimi, janë vatra zhvillimi siç janë autostradat, portet apo gjithçka tjetër që ne sot ndërtojmë dhe zhvillojmë.

Shumë faleminderit të gjithëve!